EUSKADEAN EUSKERA SUSTATZEKO HAINBAT EKINTZA:

Mankomunitateko Euskara Zerbitzuak, Eusko Jaurlaritzak egindako Euskara Biziberritzeko Plan Nagusiari jarraituz, hiru eremutan eragin nahi du:

1- Euskararen ondorengoetaratzea.
2- Euskararen erabilera: euskararen aldeko auzogintza eta zerbitzugintza.
3- Euskararen elikadura.

1- Euskararen ondorengoetaratzea:

Eremu honetako zenbait esparrutan egin daiteke lan, baina dugun eskualdearen errealitatea kontuan harturik, irakaskuntza da euskaldun-iturririk handiena, eta, beraz, horri eman behar diogu lehentasuna:

a) Irakaskuntza:

Ikastetxeetako euskara arduradunekin batera, ikasleek ikasgeletatik kanpo euskara erabil dezaten hainbat ekintza antolatu:

• Antzerki tailerrak: Momentuz, Zallako DBH-Ko ikasleentzat larunbatetan.
• Bazkalostean lehen hezkuntzako ikasleekin euskaraz jolasteko monitoreak hainbat eskoletan.
• Guraso erdaldunentzako ikastaroak ume jolasak, kantak, oinarrizko hiztegia eta esapide errazak ikasten hasteko. Taldea osatzen den udalerri guztietan egingo da. Horrela familia transmisioa landuko dugu.

"Bertsogintza" egitasmoa Zallako ikastetxeetan. Bizkaiko Bertsozale Elkartekoekin batera jarri zen abian egitasmoa, proba moduan. Aldeko ebaluazioa eginez gero, ikastetxe gehiago sartuko ditugu apurka-apurka egitasmo honetan. Bertsogintza lantzean, euskal kultura irakatsiko zaie, euskaraz pentsatzeko abilezia trebatuko da eta umeen euskararen kalitatea hobetu.

b) Euskalduntze prozesua:

"Har iezaiozu aurre etorkizunari!" lelopean antolatutako kontzientziazio kanpaina. Bertan jendea euskararen mundura hurbiltzea eta euskara ikasi eta erabiltzera animatu dugu. Horretaz gain, hitz egiteko taldetxoak antolatzeko aukera ematen dugu. Horretarako Enkarterriko Udal Mankomuitateko Euskara Zerbitzuari deitu behar zaio: 946 671 851

c)Familia bidezko transmisioa bultzatu:

Informazioa bidali guraso eta gurasogaiei; etorkizunean, beren seme-alabekin euskaraz aritzeko beraiek ere euskaraz jakiteak izango duen garrantzia jakitera emateko.

goiko menua

2- Euskararen erabilera: euskararen aldeko auzogintza eta zerbitzugintza:

a) Euskararen Erabilera Plana egitea eta garatzea herri administrazioan.

Mankomunitateko herri bakoitzaren Erabilera Plana osatuko da. Behar diren datuak batu ondoren, udal bakoitzaren egoera aztertuko da (hizkuntza eskakizunak, derrigortasun datak, idatzizko agiriak, jendearen aurreko sailak, lan jardunak,....). Horren ostean, erabilera plana osatuko da eta abian jarriko da, Mankomunitateko udal erakunde horietan euskara zerbitzu hizkuntza izan dadin. Horretarako langileak prestatu eta trebatu beharko dira ikastaroen bidez.
Izan ere, Mankomunitateak berak eta sei udalek onartu dute plana dagoeneko, Zallako Udalak, Gueñeseko Udalak, Karrantzako Udalak, Gordexolako Udalak, Artzentaleseko Udalak eta Turtziozeko Udalak, hain zuzen ere.

b) Euskararen erabilera Merkataritzan.

Enkarterriko Mankomunitateko merkataritzan barruko eta kanpoko hizkuntza paisaia euskalduntzea, toki euskaldunak identifikatzea, merkatariei eta ostalariei euskararen erabilera handitzeko aukera eman bezeroekin dituzten harremanetan.

c) Aisialdia
Eremu hau ere funtsezkoa da eskualdean euskarak aurrera egitea nahi izango badugu, zeren ume eta gazteen artean aurki baitezakegu eskualdeko euskaldun kopururik handiena.

" Euskaraz bizi" egitasmoa. Egitasmo horren bidez saiatuko gara umeei, batez ere, kalean euskaraz hitz egiteko eta lagunekin jolasteko aukera ematen. Herri asko direnez hainbat asteburuetan baino ez ditugu ekintzak antolatu. Herri txikietan hiru egunetan, apiriletik maiatzera, egongo dira tailerrak, ludoteka, puzgarriak,... monitore euskaldunekin; herri handietan, eskaintza ugariagoa denez, bi egunetan egongo dira jolasak, puzgarriak, ludoteka....(maiatzetik ekainera).

Begiraleentzako ikastaroak. Eskualde honetan ez dago ia astialdiko talderik eta gutxiago euskaldunak direnak. Beraz, garrantzi handikoa litzateke monitore euskaldunen talde bat sortzea, bertako ume eta gazteekin jardun dezaten.
Horrela izanda, ikastetxekoen laguntzaz ikastaroak antolatzeko asmoa daukagu, hurrengo ikasturteari begira.

goiko menua


3- Euskararen elikadura:

a) Oskorri: "The Pub ibiltaria":

Iazko ildo beretik, Eskualdeko hiru herritan izango da musika-ikuskizun hori, maiatzaren 5, 10 eta 31n. Turtziozen, Galdamesen eta Sopuertan izango da. Ikuskizun honen bidez, umeak, gazteak eta helduak hurbilduko ditugu euskal mundura eta protagonista izango dira egun batean.

b) Olentzerori gutuna.

Ekintza honen helburua honako hau da: euskara idatziari garrantzia ematea eta eguneroko gauzetan (gutunak,...) euskara erabiltzeko ohitura areagotzea.
Horretarako lehiaketa bat antolatu dugu. 6-10 urte bitarteko umeek Olentzerori gutun bat euskaraz idatzi beharko diote. Partehartzea sarituko da, oraingoan. Sariak Sodupeko Kiroldegian eta Karrantzako Kultur Etxean banatuko dira, eta banatu baino lehen (18:00etan) ikuskizun bat egongo da: Sodupen, "Morgan Pirata Gaiztoa lapurretan" antzezkizuna; eta Karrantzan, Eriz Magoa.

goiko menua