Aurkezpen Ofiziala. Balmaseda eta Enkarterriko Mankomunitatea elkarrekin euskararen erabilera bultzateko Berbalagun Enkarterrin
Balmasedako Udala, Enkarterriko Mankomunitatea, Enkarterriko AEK eta Enkarterriko Udal Euskaltegia bildu dira eskualdean euskararen erabilera bultzatu eta Berbalagun egitasmoa abian jartzeko. Otsaialren 16an, aurkezpen ofiziala egin zen Zallako kultur etxean.
Berbalagun eskualdeko euskaldunen sarea izateaz gain, ikasgeletatik kanpo euskara erabiltzeko parada ere eskainiko du. Horretarako berbalagun talde txikiak osatuko dira, eta giro lasai eta alaian, partehartzaileek euskaraz aritzeko konpromisoa hartuko dute. Talde bakoitzak arduraduna izango du, eta hauek egitasmoaren dinamizatzaile Ana Berazarekin koordinatuko dira.
Enkarterriko Berbalagun egitasmoak zerbait berria eskainiko du: Euskararen Agenda. Berton, Enkarterrin euskaraz antolatzen diren kultur ekitaldi guztien berri emango da, eta honi buruzko informazioa kartel, posta elektroniko eta etxeetara bidalitako gutunen bidez jakinaraziko da. Honetarako, eskualdeko kultur elkarteen partehartzea sustatuko da.
Enkarterriko biztanleen %14 euskalduna da eta urtero, 300 ikasle baino gehiago matrikulatzen dira bertoko euskaltegietan. Sustatzaileen hitzetan, “ikasprozesua asko luzatzen da hizkuntza erabiltzeko oztopoengatik, hortaz, berebiziko garrantzia du erabilera-guneak sortzeak, jendeak euskaraz aritzeko lotsak galdu ditzan.” Gotzon Lobera, Bizkaiko Foru Aldundiko Euskara Sustatzeko zuzendaria; Koldo Artaraz, Enkarterriko Mankomunitateko presidentea; eta Joseba Zorrilla, Balmasedako Udaleko alkatea. Guztiek egitasmoa abian jartzeko, elkarlanean aritu izana azpimarratu zuten. Gonbidatuen artean, hainbat elkarteetako ordezkari egon ziren, eta hauek ere euren eskarmentuen berri eman zuten.
Ekitaldiari bukaera emateko, Arkaitz Estiballes bertsolariak entzundako guztien laburpena egin zuen bertsotan. Eta osteko luntxean, Ruben Sanchezek monologoa eskaini zuen eta euskaldunberri baten komeriak izan zituen hizpide.
Zer da BERBALAGUN?
Euskarak gaur egunean Enkarterrin duen egoera ikusita, eta batez ere euskaraz dagikunok edo ikasten gabiltzanok berba egiteko ditugun aukera murritzak kontuan hartuta, BERBALAGUN egitasmoa abian jarri dugu, eta helburuak argi dauzkagu; alde batetik, Enkarterriko euskaldunok elkar ezagutzea eta bestetik, hitz egiteko aukera gehiago sortzea.
Mankomunitateko Euskara Zerbitzua, Balmasedako Euskara Zerbitzua, Enkarterriko Udal Euskaltegia eta Enkarterriko AEK programaren eragileak dira. Partalde guztion helburua eskualdeko gainontzeko talde, elkarte eta gizabanakoekin elkarlanean hastea da, euskararen normalkuntza prozesuan denon ahalegina eta ekarpenak beharrezkoak baitira.
Norentzat da BERBALAGUN?
Euskara ikaslearentzat: Euskaltegian bazaude edo egon bazara, baina ez baduzu norekin hitz egin hemen duzu aukera. Euskaldunarentzat: Normalean gazteleraz egin arren euskaraz gehiagotan egin gura baduzu, hemen duzu aukera. Euskara ez dakienarentzat: Agendaren bitartez euskarak dituen baliabideekin gozatzeko, hemen duzu aukera.
Zer eskaintzen du BERBALAGUNak?
Berbalagunak: Adina, zaletasunak, eta disponibilitatea kontuan hartuta lauzpabost laguneko taldeak osatuko dira. Euskaraz hitz egiteko konpromisoa hartuta talde bakoitzak dinamizatzailea aukeratuko du eta denon artean erabakiko dute noiz, non eta zertarako bildu.
Euskararen Agenda: Ikastaroak, txangoak, kultur ikuskizunak, kontzertuak, antzerkia, errezitaldiak, bertso saioak, diaporamak, eztabaida foroak, hitzaldiak, erakusketak...
